Bilang kan mga nakarecober sa Covid-19 sa Sorsogon, nadagdagan

Liwat na nadagdagan an bilang kan mga nakarecover sa Covid-19 sa Sorsogon.

Ini makalihis na dagos ng tugutan na maka-uli sa saindang harong kan Provincial Health Office si Analiza D. Bayoca, 45 anyos na residente kan Brgy. Maningcay De Oro, Prieto Diaz, Sorsogon.

An nasabi ng persona iyo an enot ng naerehistro bilang Bicol Patient No. 494 na nagkaigwa nin close contact sa nagadan kaining ama na si Francisco Bayoca na binansagan bilang Bicol Patient No. 423.

Sa ibong na lado, pinangaranan ni Gobernador Chiz Escudero ang tolong persona na bagong kaso kan Covid-19 sa probinsya.

Ini iyo sinda Rona Hasal Hamor, 25 anyos kan Brgy. San Pascual, Casiguran; Marites Fulgocino Floralde, 49 anyos kan Brgy. Jibong sa Barcelona asin Darwin Deinla Balino, 19 anyos na taga Inapugan, Pilar.

Segun sa provincial government, si Hamor iyo an nagabot sa Sorsogon kan Hulyo 31 gikan sa Tondo kasabay an apat na pasahero asin sarong driver. 

Si Floralde naman iyo regular na isinasairarum sa dialysis sa sarong pribadong ospital sa Legazpi City. 

Nagpoon si Floralde mag quarantine sa Brgy. Isolation Unit kan Jibong kan Hulyo 30 asin ibinalyo sa Sorsogon Provincial Hospital. 

Sa ibong na lado, si Balino iyo an nagabot naman sa Sorsogon kan Hulyo 28 sa Caloocan City lunad nin pampasaherong van kasabay an apat na pasahero asin sarong driver na tulos man na isinairarum sa mandatory quarantine sa Pilar Quarantine Facility./ (Sorsogon Provincial Information Office)