Preparasyon sa pagbubukas klase, deretso - Deped Bicol

Deretso man guiraray an pinagigibong preparasyon kan Dept. of Education Bicol para sa pagbukas kan school year 2020-2021 sa tahaw na liwat na inatras ini gikan sa Agosto 24 pasisiring sa Okt. 5.

Sinabi ni Mayflor Jumamil, tagapagtaram kan Deped Bicol, dae nin pagbabago sa saindang preparasyon tanganing dae sinda mataraka.

Saiyang sinabi na arog man kaini an paninindogan ni Deped Regional Director Guilbert Sadsad kasabay kan gigibohon na virtual conference ngonian na semana kasabay an mga stakeholder tanganing mailatag an mga preparasyon asin maisihan an mga problema na posible pang maglowas paraber na magpoon an klase.

Sinabi ni Jumamil an pag-oktaba guiraray sa burukasan kan klase iyo an maresulta tanganing mas magkaigwa nin magkakanigong preparasyon siring kan pag-imprenta sa mga kinakaipuhan na module na gagamiton sa pagbubukas kan klase.

Mientrastanto, nagpaluwas an Department of Education (DepEd) nin bagong school calendar para sa School Year 2020-2021.

Ini kasunod naman kan pagkaoktaba kanpagbubukas kan klase na gigibuhon kuta sa Agosto 24 alagad naisibog ini sa Oktubre 5, 2020.

Sa bagong school calendar na ipinaluwas kan DepEd mapoon an klase sa Oktubre 5, 2020 asin matatapos sa Hunyo 16, 2021.

Ipigtalaan naman kan DepEd an Christmas vacation sa Disyembre 20, 2020 hasta sa Enero 3, 2021.

An pagbabago kan school calendar kasunod naman kan naeeksperyensyang pandemya sa nasyon.

Sa ibong na lado, pigtugotan man kan DepEd an mga pribadong eskwelahan asin mga non-DepEd schools na magpoon kan klase nin mas atab sa Oktubre 5, alagad dapat siguruhon kan mga ini na nakapagsumite na sinda kan mga kinakaipohang dokumento sa ahensya, siring man kan school calendar.

Mentrastanto, sa giraray na piglinaw kan ahensya na dae magkakaigwa nin face-to-face classes tanganing malikayan an anuman na peligrong dara kan COVID-19./ (DZGBNews Online)