Provincial Government, Bumuo Ng Swab Team

 

Binuo ni Governor Chiz Escudero ang isang grupo na mangunguna sa agarang pagkuha ng mga swab samples mula sa mga Sorsoganon na sumasailalim sa mandatory quarantine sa iba’t ibang quarantine facility sa lalawigan.

 

Layon sa pagbuo ng Sorsogon Provincial Team ay para marami at mabilis maisagawa ang pagkuha ng mga swab samples na isinusumite pa sa Bicol Regional Diagnostic and Reference Laboratory sa Legazpi City sa lalawigan ng Albay.

 

Sa kasalukuyan, dagdag ni Gov. Chiz, mayroon lamang apat na medical technologists ang Provincial Health Office at limitado sa 60 specimens ng swab samples ng Reverse Transcription Polymerase Chain Reaction o RT-PCR test kada araw ang nagagawa nila para sa buong lalawigan.

 

Sa ilalim ng Office Order No. 81-2020 na pinirmahan ni Governor Chiz noong Agosto 10, 14 pa na medical technologists mula sa mga panlalawigang ospital sa ilang bayan ng Sorsogon ang magiging kabilang sa naturang grupo.

 

Una ng pinirmahan ng gobernador ang Executive Order 51-2020 na nagsasaad na ang mga nasa mandatory quarantine ay kinakailangang sumailalim sa RT-PCR test o swab test sa ika-pitong araw ng kanilang pamamalagi sa iba’t ibang quarantine facilities sa lalawigan ng Sorsogon.

 

Sa kabilang dako, pinayagan na ng Provincial Health Office na makauwi sa kani-kanilang tahanan sina Veronica Brusola Honrubia, 23 taong gulang ng Brgy. Zone 7 at Joan Arguelles Hona, 23 taong gulang ng Brgy. Lajong parehong nasa bayan ng Bulan.

 

Ito’y makaraang tuluyan ng makarecover at gumaling makaraang tamaan ng virus.

 

Ayon sa ulat, sina Honrubia at Hona ay nagkaroon ng close contact sa limang magkakamag-anak na positibo sa COVID19 virus noong Hulyo 27 ng makasabay ang mga ito sa pagbiyahe patungo Sorsogon mula Bulacan.