Opisina kan NEDA asin DTI Bicol paramientras na sarado para makapagsagibo nin disinfection

Paramientras na sarado ngonian an opisina kan National Economic and Development Authority (Neda) Regional Office 5 sa Brgy. Arimbay sa ciudad kan Legazpi.

Ini mismo an kinompirmar ni Neda Bicol Regional Director Agnes Tolentino makalihis na madiskobre na saro sa saindang mga empleyado an nagkaigwa nin close contact kan sarong persona sa Daraga, Albay na nagpositibo sa Covid-19.

Saiyang ipinaliwanag na dahilan kaini magkakaigwa sinda nin disinfection sa gabos nindang opisina asin mga pasilidad bilang pasiguro mantang an mga empleyado iyo an nasa work from home ngonian.

Dagdag pa kan opisyal na an pagsasara kan saindang opisina madurar sagkod sa aga, Agosto 14.

Mientrastanto, paramientras man na isinarado sa publiko an opisina kan Department of Trade and Industry o DTI Bicol para magsairarom sa disinfection activity.

Segun kay DTI Bicol OIC Regional Director Rodrigo "Digs" Aguilar, saiyang sinabi na kinakaipohan nindang magkondusir nin disinfection activity bilang preventive measure asin pagsunod sa medical protocols matapos na magkaigwa nin contact an saro sa mga personahe nindang igwa nin contact sa sarong nagpositibong pasyente nin COVID-19.

Kun matapos tulos an disinfection, posibleng bumalik sa normal an operasyon kan saindang opisina ngonian na aldaw. 

Alagad, nagtaong asegurasyon si Aguilar na daing dapat ikahadit an publiko lalo na an mga igwa nin transaksyon sa saindang opisina dahil sa maski padagos man giraray an saindang serbisyo publiko sa paagi nin online services asin bukas man an saindang provincial offices pati na an mga Negosyo Center. (DZGBNewsOnline)