KBP Sorsogon asin Gov. Chiz, nagpahayag nin pagkondenar sa pambabadil gadan kan Jobert Bercasio; PNP Bicol nagbilog na nin special taskforce

 

Magkasabay na kinondenar kan Kapisanan ng mga Broadcaster ng Pilipinas – Sorsogon Chapter asin ni Gobernador Francis Joseph Escudero an pambabadil gadan kan Jobert Bercasio na freelancer kan sarong internet news portal na nakabase sa cidad kan Sorsogon.

Sa social media post kan gobernador, deneherean kaini an mga otoridad na imbestigaran nin husto an krimen asin panimbagon an nasa likod kan pananambang.

Tulos man na nagpaabot nin pakikipagmundo si Gov. Chiz sa nawalat na pamilya ni JB na mas kilala sa apod na Polpog.

Kaparehas man kaini an sentimiento sa ipinalowas na pahayag kan KBP Sorsogon.

Segun sa KBP, dapat na maghiro an pulisya tanganing panimbagon an nasa likod kan pambabadil gadan kun saen bako sana ini an primerong bes na nangyari sa probinsya na miembro kan media an biktima kan insurhensiya.

Maging an pambabadil gadan sa DJ kan Padaba-FM Bulan na si Ric Ian De Leon iyo an kaipuhan man nin marikas na aksyon./

Sa ibong na lado, tulos na nagbilog nin Special Investigation Team “Bercasio” ang Police Regional Office 5 kasunod kan isinasagibong imbestigasyon kan mga otoridad sa probinsya dapit sa pambabadil gadan kay Jobert Bercasio na sarong commmentator kan Balangibog Internet TV.

Kasunod man kaini an madoon na pagkondenar kan PNP Bicol sa siring na insidente asin pagsiguro nin mas hararom na imbestigasyon.

Matatandaan na binadil an biktima harane sa sarong gasolinahan sa Sea-breeze Homes Subdivision, Brgy. Cabid-an, Sorsogon City kan nakalihis na banggi.

Sa imbestigasyon kan pulisya, sakay si JB kan pigmamanehong motorsiklo gikan sa Sorsogon City proper kan tambangan kan kasunudan na riding in tandem.

Sinabi pa sa report, an dowang gunman iyo an parehong nakasulot nin helmet asin itom na jacket lunad nin kolor blue na MIO motorcycle na tulos man na duminulag pasisiring sa direksyon kan Diversion Road sa Brgy. Cabid-an makalihis na gibohon an krimen.

Nakua naman sa crime scene an 4 na basyo kan dae pa madeterminaran na kalibre nin badil kun saen sosog sa enot na naglowas na report gikan sa M16./