3 medical worker sa RHU Pilar, tinamaan kan Covid-19

Tolong frontliner na kinabibilangan kan sarong doktor na nagtatrabaho sa Rural Health Unit kan Pilar an kabilang sa mga bagong tinamaan kan corona virus disease sa probinsya kan Sorsogon.

Enot ng pinangaranan ni Gobernador Francis Joseph Escudero an mga ini na sinda Dr. David Remedios Daza, 57 anyos, David Aquino Mandrilla Jr., 53 anyos, Sanitation Officer na mga residente kan Brgy. Banuyo asin si Mark Ramir Co Manalang Jr., 29 anyos na sarong medical technologist kan nasambit ng RHU.

Apwera kaini, kasabay man sa nadagdag sa listahan kan mga nagpositibo sa Covid-19 an sarong 59 anyos na babaye na residente kan Brgy. San Jose sa banwaan pa man guiraray kan Pilar na may Bicol Code Number 1616.

Dahilan kaini, suminakat na sa 32 an kompirmadong kaso kan virus sa Pilar, 18 sa siring na bilang iyo an mantenidong aktibo.

Sa ibong na lado, nadagdagan an bilang kan mga nakarecober sa Covid-19 sa Sorsogon makalihis na magrahay si Bicol 1224  na sarong empleyado kan Provincial Health Office.

Enot ng pinangaranan kan gobernador an nasabing persona na si Fernan Lafuente Ocampo, 52 anyos na residente kan OLV, Pangpang sa Sorsogon City asin sarong rehistradong nurse na kabilang sa Emerging and Re-emerging Infectious Disease o EREID COVID-19 Team kan probinsya.//