CONTACT TRACING SA MGA NAKILAMAY SA NAGADAN NA LOLO SA GUBAT NA NAGPOSITIBO SA COVID-19, NAGPAPADAGOS

Padagos an pinagigibong contact tracing kan lokal na gobyerno kan Gubat sa mga persona na nagkaigwa nin close contact sa sarong 76-anyos na lolo na binawian nin buhay asin nagpositibo sa Corona virus disease.

Sa facebook post kan LGU Gubat, nangapudan ini sa publiko partikularmente sa mga nakilamay sa burol ni Ruben Funtanar Lasala kan Mabini Street na tulos na magreport sa barangay health center asin Bhert (Health and Emergency Response Team) tanganing tulos na mai-isolate asin mas na maparikas an pinagigibong contact tracing.

Nagadan si Lasala sa sarong pribadong ospital kan nakalihis na Sept. 4 alagad naglowas sana an resulta kan swab test na nagpositibo sa swabtest sa Sept. 6 Covid-19 update kan Dept. of Health Bicol.

Sa ibong na lado, paramientras na sarado sa publiko an Rural Health Unit kan Gubat nin huli sa naka-quarantine an gabos kaining personahe bilang parte kan ipinapasunod na protocol.

Pangapudan man kan LGU sa publiko na magsunod sa mga health protocols siring kan pirmeng pagsul-ot nin facemask, pag obserbar sa social distancing asin an pagpractice kan proper hygiene./