Half-mast sa bandera kan Pilipinas sa mga estasyon kan pulisya sa probinsya, ipinagsugo ni Gov. Chiz kasunod kan pagkakagadan ni 2D CongW. Ditas Ramos

 

Tulos na ipinagsugo ni Gobernador Francis Joseph Escudero an pagbugtak sa half-mast kan bandera kan Pilipinas sa gabos na estasyon kan pulisya sa bilog na probinsya kan Sorsogon.

Ini bilang pakikisumaro sa pagmundo sa pamilya kan nagadan na si CongW. Ditas Ramos kan segundo distrito kan probinsya.

Sa opisyal na pahayag kan gobernador, ipinaabot man kaini an pakikipagmundo sa pamilya asin pamibi kay Tiya Ditas.

Pigpasalamatan man ni GOv. Chiz an naging kontribusyon kan lehislador sa pag-oswag kan probinsya.

Si CongW. Ramos iyo an nasa primerong termino pa sana sa saiyang pwesto na nagsalida kay Cong. Ding Ramos na nagradwar bilang representante kan segundo distrito asin kaalyado siring man kapartido ni Gov. Chiz kan nakalihis na eleksyon./

Buminuhos man an pakikipagmundo sa pamilya Ramos makalihis na bawian nin buhay si 2D Rep. Ditas Ramos dahilan sa Covid19.

Manlaenlaen na post sa social media an nahiling na nagpahayag nin pagkabigla asin pagmundo sa siring na bareta.

Pinasalamatan man kan mga kapartido an kongresista siring man kan mga kaamigo kaini na nakasabayan pa kan mga nakalihis na aldaw.

Saro sa naging emosyonal asin dae maiwasan na mapaluha si Sor. City Vice Mayor Eric Dioneda makalihis na maresibe an siring na bareta.

Maging an mga miembro kan Junta Probinsyal sa primer distrito asin si Gubat Mayor Sharon Escoto iyo an nagpaabot nin pakikipagmundo sa pamilya Ramos./

An pagkakagadan kan kongresista, enot na ipinaabot ni Deputy Speaker Raneo Abu mantang nagkakaigwa nin plenary session sa laog kan Kamara.

Dae na tinapos kan mga kongresista an sesyon asin nag-alay nin pamibi kan maaraman an siring na bareta.

Si CongW. Ditas an ikadowang lehislador na binawian nin buhay dahilan kan siring na helang mantang dae pa nin ipinagpapalowas na opisyal na pahayag ang pamilya Ramos maging an tugang kaini na si dating Cong. Ding Ramos dapit sa detalye kan mamundong bareta./