Libreng internet connection asin ICT room binukasan sa Zone 8, Bulan para sa mga estudyante

Tanganing makatabang sa online class kan mga estudyante, dagos ng binukasan sa publiko ang ICT room asin library na may libreng internet connection sa mga estudyante sa Brgy. Zone-8, Bulan Sorsogon.

Segun kay Zone 8 Sanggunian Kabataan Chairman Justine Gigantone, libre na magagamit kan mga estudyante na residente kan barangay an mga computer na nakakabit sa internet.

Pupwede man na magdara nin sadiring laptop o smartphone an mga estudyante na mapasiring sa ICT room tanganing libreng makapag online o maka-access sa internet dahil sa tolo man sana an eksistidong nakakabit na desktop computer digde.

Saiyang sinabi na kaipuhan sana na makapagpresenter nin school ID an mga ini paraber na tugutan na makalaog o makagamit nin internet na matutuparan sa 2nd floor kan barangay hall.

Tinawan man nin doon kan SK Chairman na mahigpit nindang ipapasunod an mga health protocol mantang dae tutugutan an anoman na aktibidad na lowas sa online study siring kan pag-oonline gaming kan mga hobenes.//

(Photo grab from FB Post of SK Gigantone)