Pagsasairarum sa lockdown sa nagkapirang harong sa Pilar, ipinagsugo

Tanganing mapugulan an posible pang paglakop kan Corona virus disease o Covid-19, ipinagsugo ni Pilar Mayor Carolyn Sy-Reyes an pagsasairarum sa lockdown kan mga kaharongan kan mga persona na naolakitan kan nasambit ng virus.

Sa executive order number 66-2020 na pirmado kan alkalde, sinabi kaini na bawal ngona an paglowas sa harong kan mga kapamilya o mahal sa buhay kan mga active positive Covid-19 patient apwera na sana kun emerhensiya an mga ini o kinakaipuhan nanggad.

Ipinagsugo man ni Mayor Reyes an pagkakaigwa nin ‘restrictions’ sa mga unnecessary movement sa gabos ng barangay kan Pilar makalihis na madagdagan an kaso kan Covid-19 kun saen sarong paratienda nin isda ang nagpositibo.

Sa ngonian, suminakat na sa 17 an kaso kan Covid-19 sa Pilar, kun saen sampolo sa nasambit ng bilang iyo an mantenidong aktibo./