Doktor kan Provincial Health Office Sorsogon, nagpositibo sa Covid-19

Doktor kan sarong ospital an saro sa 4 na bagong kaso kan Covid-19 na naerehistro digde sa ciudad kan Sorsogon.

Ini makalihis na pangaranan ni Gobernador Francis Escudero an apat na indibidwal na panibagong kaso kan Covid-19 sa probinsya.

An mga ini binistong sinda Erwin L. Javier, 58 anyos, doktor kan Provincial Health office; Choi F. Gonzales, 33 anyos asin Joshua Austin L. Beli, 22 anyos, mga medical workers sa sarong pribadong ospital sa ciudad asin si Gilda R. Pancho, 60 anyos na sarong fish vendor kan Pilar. 

Segun sa Provincial Information Office Sorsogon, si Javier na taga Camalig, Albay asin presenteng nageerok sa Sorsogon City iyo an nakarehistro bilang Bicol Patient No. 1296 mantang si Gonzales na taga Brgy. San Isidro sa banwaan kan Bulusan asin si Beli na residente kan Brgy. Cabid-an sa Sorsogon City iyo an nagkaigwa nin close contact kay Bicol Patient 812 na enot ng nagadan dara kan COVID-19 virus. 

Sa ibong na lado, padagos an pinagigibong beripikasyon sa history of travel o kun saen nakua ni Pancho an nasambit ng virus.

Liwat man na tinawan nin doon kan gobyerno probinsyal na boluntaryong nagpirma nin waiver an mga ini tanganing mas pasil an pinagigibong contact tracing kan mga otoridad./