Pagpapatindog nin makabagong ospital kan probinsya, siniguro ni Gov. Chiz

Kinompirmar ni Sor. Gov. Francis Joseph Escudero na pinagpapakarhay na kan gobyerno probinsyal an pondo para sa mas marhay na serbisyo kan Dr. Fernando Duran Sr. Memorial Hospital na mas kilala sa apod na Sor. Provincial Hospital.

Sinabi kan gobernador, rurubaon an old hospital dangan na magtitindog nin bagong pasilidad asin kokompletohon an mga gamit o ekipahes digde.

Tinawan man nin doon no Gov. Chiz na magkakaigwa man ni cancer clinic sa bagong ospital kan probinsya mantang pinagpoponan na an procurement para sa pagbakal nin machine na gagamiton kan probinsya sa oras na magkaigwa nin dengue outbreak.





Paliwanag kan gobernador, sa paagi kaini maiiwasan na an pagpasiring pa sa ciudad kan Legazpi kan mga Sorsoganon na nangangaipo nin serbisyo medikal dahilan sa hihinguha-on kan probinsya na makomplehan an gabos na pangangaipo kan provincial hospital.