Sor. Bishop Jose Alan Dialogo, may pangapudan sa mga Katoliko laban sa NCoV

Kasabay kan pagselebrar kan kafiestahan sa paghahandog kay kristo sa templo , Pebrero 2 o mas kilala sa apod na kandelaria, nagpalowas nin kasuguan an simbahan katoliko para makalikay sa peligrong dara kan 2019 Novel-Coronavirus.

Sa ipinalowas na surat ni Sor. Bishop Jose Alan Dialogo, ipinunto kaini an limang bagay tanganing maiwasan an posibleng pagkalat o pagkaka-ulakit sa siring na helang orog na kun nagkakaia nin banal na Misa.

Pangapudan kan obispo sa mga katoliko na iwasan na ngonian an paghahawak kamay kada bes nagkakanta kan Ama Niamo asin pag-aabrasa o pakikipag hand shake sa kada pagtatao nin sign of peace.

Pinasisiguro man ni Bishop Dialogo an pirming pagsasalida sa Holy Water asin pagbugtak ni tela sa mga kumpisalan bilang proteksyon mantang nagkumkumpisal.

Hagad man kan Simbahan sa mga maresibe nin komunyon na kamot na ngona an gamiton sa pag-ako kan Ostia imbes an naka-ugalian na pighuhungit ini kan padi.

Pangapudan man ni Dialogo na kun mapipwede iwasan na ngona an paghadok sa kamot o singsing sa obispo asin mga kapadean tanganing maghagad nin bendisyon.

Hagad man kan obispo an pirmeng pagpamibi kan “Oratio Imperata” o special prayer sa mga pinagigibong misa tanganing malabanan an siring na epedemya.