Taskforce NCoV Sorsogon, nagconvene

PIA Sosogon Photo

Tulos na nag-convene an manlaenlaen na ahensyas kan gobyerno sa probinsya kan Sorsogon kasunod kan pagkakamukna kan Task Force NCoV-ARD.

Sosog sa report, pinangenotan ni Sorsogon Vice Governor Manuel L. Fortes, Jr. an emergency meeting kun saen presente an mga ahensyas kan gobyerno siring kan Dept. of Education, DOH asin Provincial Health Office Sorsogon.

Enot ng pig-organisar an Sorsogon Provincial Task Force NCOV sa kosog kan ipinalowas na Executive Order number 06-2020 kan Chairman kaini na si Sorsogon Governor Francis Joseph G. Escudero.

Vice Chair naman sa siring na taskforce si Sorsogon provincial health officer, Dr. Renato Bolo, Jr. na may katuyuhan na magbilog nin magkakanigong lakdang asin paghahanda sa tahaw kan peligro kan NCoV.

Mientrastanto, itinaas na sa blue alert kan Regional Disaster Risk Reduction & Management Operation Center an saindang status, poon kan nakalihis na Peb. 6, 2020.

Katakud kaini, sinugo ni Office of the Civil Defense Bicol Regional Director Claudio Yucot an gabos na local DRRM na mahigpit magmonitor sa saindang mga nasasakupan na lugar sa posibleng paglaog kan NCoV kasabay na an pagsasagibo nin magkakanigong paghahanda o precautionary measure.