Temporary lockdown sa district hospital kan Castilla, ipinaotob

Nagpalowas nin kasuguan si Castilla Mayor Isagani Mendoza na nagsasairarum sa temporary lockdown sa saindang district hospital makalihis na makapagrehistro nin dowang bagong kaso nin Covid-19 kun saen parehong mga health workers an tinamaan.

Sinabi ni Mendoza, na dahilan kan siring na development, dae na ngona maako nin bagong pasytente an district hospital mantang irerefer na sana sa pinakaharaning ospital an kinakaipuhan nin medikal na atensyon partikularmente an mga dapat na i-confine.

Sa ibong kaini, siniguro kan alkalde na naka-isolate na ngonian sa saindang quarantine facility an ibapang mga health workers na nagkaigwa nin primary close contact sa dowa.

Ipinaotob an siring na lockdown ngonian na aldaw, Agosto 30 asin posibleng magdurar sa oras na matapos man an ginigibong contact tracing asin disinfection kan LGU./