2ng sitio asin RHU, isinairarum sa lockdown kan LGU Pilar

Bantay sarado ngonian kan mga otoridad an dowang sitio o purok sa banwaan kan Pilar makalihis na ipagsugo kan alkalde an pagsasairarum kaini sa 14 diaz na lockdown.

Sa pinirmahan na Executive Order No. 61, series of 2020 ni Mayor Carolyn Sy Reyes, isinairarum kaini sa lockdowan an Purok 1 asin 2 kan Brgy Dao tanganing mapugulan an possible pang pagkalat kan virus.

Denereheran man kan alkalde an mga miembro kan Brgy. Health Emergency and Response Team na siertohon na nasusunod an lockdown asin maayudahan an mga residentes digde sa pagbakal kan saindang mga mayor na pangangaipo.

Kinompirmar man kan opisyal, na natunton na kan Municipal Health Office an nasa 22 indibidwal na may primary contact sa sarong health worker na nagpositibo sa virus.

Sa ibong na lado, nakapendiente sa ngonian an pag-ako nin pasyente kan Rural Health Unit kan Pilar makalihis na isairarum ini sa temporary lockdown kan lokal na gobyerno.

Nagpalowas man nin abiso sa publiko si Alkalde Carolyn Sy-Reyes na darahon na ngona an mga pasyente partikularmente an mga non emergency case sa lying-in clinic sa Vicente Peralta Memorial Hospital sa Brgy. Cumadcad sa banwaan kan Castilla.

Paliwanag ni Sy-Reyes, ipinaotob an lockdown sa ospital mantang pinagigibo an contact tracing para maiwasan an posible pang pagkalat kan virus.

Suminakat na ngonian sa 12 an kompirmadong kaso kan Covid-19 sa Pilar makalihis na madagdagan nin dowang panibagong kaso na kinabibilangan ninda Bicol patient#1091 na sarong 89-anyos na lalaki na residente kan Brgy Dao asin si Bicol patient#1109, sarong 45-anyos na utility worker asin residente kan Brgy. Marisfoque./