Temporary lockdown sa sarong purok, ipinagsugo kan LGU Castilla, makalihis na magadan an sarong lola sa Covid-19

Tulos na nagpalowas nin kasuguan an lokal na gobyerno kan Castilla na nagsasairarum sa temporary lockdown sa sarong putok sa Brgy. Cumadcad makalihis na maerehistro an primerong kaso kan Covid-19 sa lugar na binawian pa nin buhay.

Sosog sa report, tulos man na nagsagibo nin disinfection an LGU sa Purok Sampaguita asin mga pampublikong lugar.

Nagdestribwer man an lokal na gobyerno nin bitamina asin pagkaon sa nagkapirang pamilya o households na paramientras na nakaisolate dahilan sa ipinaotob na lockdown.

Sa ibong na lado, padagos man an ginigibong contact tracing kan mga otoridad sa nakasalamuha kan 78-anyos na lola na binawian nin buhay kan Agosto 14 dahilan sa corona virus desease.

Tulos man na inilubong an biktimang si Maria Asiado Mallorca na sarong retiradong paratukdo mantang nagpaabot man nin pakikipagmundo an LGU sa mga nabayaan kaining pamilya.

Enot ng naglowas sa resulta kan post-mortem RT-PCR test o swab test na isinagibo kay Mallorca na nagpositibo ini sa virus.

Enot na dinara si Lola Maria sa sarong pribadong ospital sa Legazpi City, Albay kan Agosto 13 dahilan sa pangungulog kan tulak asin makalihis na matawan nin magkakanigong atensyon medikal asin makaginhawa, uminuli man tulos sa saindang residensya.

Banggi kan kaparehong aldaw kan liwat na sumpongon nin grabeng pangungulog kan tulak an biktima na dinalagan man tulos sa Sorsogon Provincial Hospital kun saen digde na ini binawian nin buhay, kinaagahan, Agosto 14./