Sorsogon, nakapagrehistro nin mga bagong kaso kan Covid-19; Sorsogon City may pinadakol na aktibong kaso

Onseng panibagong kaso kan Covid-19 an naerehistro sa probinsya kan Sorsogon kan nakalihis na weekend sosog sa Agosto 22 na report kan Dept. of Health Bicol.

Sampolo sa nasabing bilang iyo an nagkaigwa nin close contact sa Covid-19 person mantang an saro na panibagong kaso iyo an LSI o locally stranded individual.

Sinabi pa sa report, 6 sa 10 ng nagka-virus iyo an gikan sa opisina kan National Irrigation Administration - Sorsogon makalihis na magkaigwa nin close contact sa saindang kaopisina na nagpositibo man sa virus.

Liwat man na pinangaranan ni Gobernador Francis Escudero an mga ini na sinda Sherwin R. Nopre, 29 anyos na gikan sa Camaligan, Camarines Sur; Cammille B. Haya, 27 anyos na limang bulan na bados asin residente kan Barangay Tugos; Anne A. Santos, 46 anyos kan Barangay OLV Bibincahan; Zenaida B. Esmen~a, 48 anyos na residente kan Barangay San Juan Bag-o, Bulan; asin si Genaro G. Capron Jr., 46 anyos na taga Palanas, Masbate.

Sa ibong na lado, dae na pinangaran kan gobernador an saro sa mga nagpositibo na gikan sa nasabing ahensya dahilan sa nagsairarum ini sa RT-PCR test o swab test sa probinsya kan Camarines Sur.

Kasabay man sa pinangaranan kan gobernador an apat na persona na naolakitan kan virus na mga residente kan Barangay Jibong sa Barcelona, Sorsogon.

Ini iyo sinda Melinda F. Orejela, 55 anyos asin Rosenda G. Dino, 48 anyos na nagtatrabaho bilang Barangay Health Workers; Antero D. Floralde, 51 anyos na sarong Barangay Kagawad asin an 55-anyos na barangay tanod na si Minda E. Gallego.

Sa ibong na lado, pinagbisto naman an LSI na si Dharwin G. Almin~e, 18 anyos na taga Brgy. San Francisco, Bulan Sorsogon.

Padagos man ngonian na pinagkokompleto kan Provincial Health Office Sorsogon an detalye dapit kay Bicol #1017 na residente kan Sor. City na panibagong kaso kan Covid-19 sa ciudad.

Sa ngonian, sinabi kan gobernador, nasa quarantine facility na an mga ini asin padagos na pinag-oobserbahan kan mga doktor mantang masairarum sa mandatoryong pagkakwarentina.

Dahilan kaini, suminakat na sa 86 an kompirmadong kaso kan Covid-19 sa Sorsogon, as of 9am kasuudma mantang an ciudad kan Sorsogon an nakapagrehistro na nin pinakadakol na aktibong kaso na uminabot sa 11, na sinundan kan Bulan na may 7, 6 sa Pilar mantang may tiglimang kaso sa Barcelona asin Matnog./