2 persona asin pamilya kaini, isinairarum sa mandatory quarantine kan LGU Irosin dahilan kan sa liwat sa pagbalgar sa quarantine protocol

Tulos na ipinagsugo kan LGU Irosin an pagsasairarum sa quarantine kan dowang persona asin kan bilog nindang pamilya makalihis na balgaron an ipinapaotob na protocol sa probinsya.

Ini makalihis na madiskobre kan LGU basado sa sumbong kan mga brgy official na nag=uli an mga ini sa saindang harong sa Brgy San Agustin gikan sa Camalig, Albay na dae nag-agi sa quarantine facility.

Dahilan kan siring na bagay, mandatoryo an mga ini na pigpasairarum sa 14 diaz na pagkakwarentina sa laog kan pasilidad sa Gallanosa National High School.

Liwat man na nangapudan an opisyal sa publiko na maging vigilante asin tulos na ireport an mga bagong salta sa saindang barangay tanganing maiwasan an posibleng pagkalat kan virus sa barangay.

Sa ibong na lado, nangapudan an lokal na gobyerno kan Pilar sa mga residente kan dowang barangay na isinairarum sa lockdown na mahigpit na sundon an mga pinagpapaotob na guidelines o protocol tanganing maiwasan an posible pang pagkalat kan virus.

Sinabi ni Pilar Mayor Carolyn Sy-Reyes, paramientras na ipinagbabawal an paglowas laog sa nasabing mga barangay asin pagsasagibo nin mga aktibidad na may pagtiripon kan kadakol na tawo o mass gathering.

Denereheran man kan alkalde an mga opisyal kan brgy na magsagibo nin checkpoint sa mga entry and exit point kan saindang lugar tanganing masiguro na dae makakalowas nin basta basta an mga persona sa saindang barangay.

Enot ng pinirmahan kan alkalde an Executive Order No. 54-2020 na nagsasairarum sa 14 diaz na lockdown sa Purok 1 kan Baranggay Ginablan asin Purok 7 sa Baranggay Inang.