PDRRMO Masbate padagos an pinagigibong damaged assesment kasunod kan magnitude 6.6 na linog

Padagos an pinagigibong damaged assesment kan Masbate Provincial Disaster Risk Reduction and Management Office may kinaaraman sa magnitude 6.6 na linog na naerehistro sa Cataingan, Masbate.

Sinabi ni Masbate OIC PDRRMO Chief Rino Rabalo na base sa saindang initial damaged assesment na may mga straktura, harong, asin mga tinampo an nagada asin naraot sa manlaenlaen na parte kan probinsya dara kan makosog na linog.

Saiyang sinabi na padagos man an saindang pinagigibong assesment sa mga nag-crack na mga tinampo asin edifico o estraktura para maaraman kun salbado pa ini sa publiko.

Sa ngonian, segun kay Rabalo, padagos an saindang koordinasyon sa manlaenlaen na mga MDRRMO para sa ibapang damaged report./

Sa ibong na lado, kasabay an probinsya kan Sorsogon sa nakamate nin makosog na linog kasunod kan naerehistrong magnitude 6.6 na linog sa Masbate.

Sa Earthquake Information No. 2 na ipinalowas kan Phivolcs o Phil. Institute of Volcanology and Seismology, nairehistro an linog alas 8:03 an pagkaaga kasuudma kun saen an epicenter kaini iyo an nasa siete kilometros sana an distansya sa Cataingan Masbate.

Sinabi kan Phivolcs, namatean sa Sor. City ang intensity 4 na pagyogyog siring man sa ibapang parte kan Sorsogon, Palas asin San Jacinto Masbate siring man sa Legazpi City Albay.

Sa ibong na lado, an Cataingan Masbate an nakapagrehistro nin pinakamakosog na pagyogyog na uminabot sa intensity 7 mantang intensity 5 an naerehistro sa Masbate City, Almagro asin Tagapul-an sa Samar.

Namatean man an linog sa ibapang lugar sa Samar, Quezon province, maging sa mga probinsya kan Leyte, Antique, Negros Oriental and Occidental, Capiz asin Iloilo City./

(Photo Courtesy: PRC Masbate)