Liquor ban, ipinaotob sa Gubat makalihis na makapagrehistro nin bagong kaso nin Covid-19

Nagpalowas nin kasuguan si Gubat Mayor Sharon Escoto na nag-iimposar nin temporary liqour ban sa bilog na munisipio kan Gubat kasunod kan implementasyon kan social distancing dahilan sa Covid-19.

Sa ipinalowas na executive order kan alkalde, sinabi kaini na mahigpit na ipinagbabawal an pagpapabakal o pagserbi nin mga nakakabuyong na alak kan gabos na commercial establishment.

Bawal man an pag-iirinuman sa mga pampublikong lugar o sa mga darakulang pagtiripon o mass gathering.

Tinawan nin doon ni Mayor Escoto na an sisay man na business establishment na mabayolar sa kasuguan iyo an posibleng mahampang sa pagbawi o revocation sa itinaong Mayor's Permit and Business Permit mantang mapapadusahan an sisay man na indibidwal na mapapatunayan na dae nagsunod digde suno sa mga eksistidong leyes o ordinansa.

An lakdang na ini kan alkalde ginibo makalihis na madagdagan an kaso kan Covid-19 asin nagpapadagos an isinasagibong contact tracing./