Mga kampo santo sa probinsya, sarado sa Undas

Sarado an mga kampo santo o mga sementeryo sa bilog na probinsya kan Sorsogon sa Todos Los Santos.

Ini makalihis na magpalowas nin kasuguan si Gobernador Chiz Escudero an pagsasara sa publiko kan gabos na pribado asin pampublikong sementeryo sa bilog na probinsya poon Oktobre 30 sagkod Nobyembre 3 kasunod naman kan patakaran na nagbabawal sa anoman na klase nin mass gathering sa mga lugar na nasa irarum kan Modified General Community Quarantine kasabay na an probinsya kan Sorsogon.

Nakapalaman man sa Executive Order No. 60-2020 na pirmado kan gobernador an pagtugot sa pagbisita sa puntod kan mga namaaram ng mahal sa buhay paraber o pakatapos kan siring na peryodo alagad mahigpit an patanid sa mga lokal na gobyerno o LGU na ipaotob an minimum health standard siring kan social distancing, pagsusulot nin face mask asin limitadong paglaog kan tawo sa mga kampo santo.

Denereheran man ni Chiz an mga alkalde sa bilog na probinsya na maglinig sa mga nasasakupan na mga pampublikong sementeryo mantang pinagsusunod an minimum health protocol./