Ikadowang kaso kan Covid-19 naerehistro sa Irosin; Juban, Covid-19 free na

Suminakat na sa dowa an kompirmadong kaso kan Covid-19 sa Irosin Sorsogon.

Ini makalihis na kompirmaron kan Provincial Health Office Sorsogon an siring na kaso kun saen kinilala ini ni Gobernador Francis Joseph Escudero na si Jerrico E. Perol, 35 anyos na residente kan Brgy. San Julian.

Katakud kan siring na bagay, sarong executive order an ipinalowas ni Irosin Mayor Alfredo Cielo na nagsusugo sa mas mahigpit na implementasyon kan health safety and security protocols sa bilog na munisipyo.

Sa pinirmahan na EO No. 30, Series of 2020 kan alkalde, denereheran man kaini an mga brgy official na buhayon asin mas na iaktibar an barangay COVID 19 Control Post. 

Sa paagi kaini, sinabi ni Mayor Cielo mas mamomonitor kun nagsusunod man nanggad sa mga health protocol an publiko siring kan pagamit nin face mask o face shield, pag obserbar sa physical distancing, 24-hour curfew sa mga may edad 20 anyos pababa asin 60 anyos siring man an mahigpit na implementasyon kan curfew poon alas 9 nin banggi hasta alas 5 nin pagkaaga./

Sa ibong na lado, Covid-19 free guiraray an banwaan kan Juban makalihis na dagos ng makarecover sa helang an sarong persona na nagpositibo sa virus.

Sosog sa report, dagos ng nakauli sa saindang pamilya si Michael Q. Argelles, 25 anyos kan Brgy. Cogon makalihis na tawan ini nin sertipikasyon kan Provincial Health Office Sorsogon na nakarecover na sa virus.

Apwera kay Argelles, kabilang man sa mga nakarecober sa Covid-19 si Rowena Mae Lanuza, 29 anyos na residente naman kan Brgy. San Juan Roro sa ciudad kan Sorsogon.

Tiwala an PHO sa mas marikas na recovery kan nasa 25 pang aktibong kaso sa Sorsogon na presenteng nakaquarantine asin isolate sa quarantine facility kan probinsya./